Le texte de cette page a été corrigé et est conforme au fac-similé.
Diſcours
de la methode
Pour bien conduire ſa raiſon, & chercher
la verité dans les ſciences.
la verité dans les ſciences.
Si ce diſcours ſemble trop long pour eſtre leu en vne fois, on le pourra diſtinguer en ſix parties. Et en la premiere on trouuera diuerſes conſiderations touchant les ſciences. En la ſeconde, les principales regles de la Methode que l’Autheur a cherchée. En la 3, quelques vnes de celles de la Morale qu’il a tirée de cete Methode. En la 4, les raiſons par leſquelles il prouue l’exiſtence de Dieu, & de l’ame humaine, qui ſont les fondemens de ſa Metaphyſique. En la 5, l’ordre des queſtions de Phyſique qu’il a cherchées, & particulierement l’explication du mouuement du cœur, & de quelques autres difficultez qui appartienent a la Medecine ; puis auſſy la difference qui eſt entre noſtre ame & celle des beſtes. Et en la derniere, quelles choſes il croit eſtre requiſes pour aller plus auant en la recherche de la Nature qu’il n’a eſté, & quelles raiſons l’ont fait eſcrire.
[Premiere partie.]
e bon ſens eſt la choſe du monde la mieux partagée : car chaſcun penſe en eſtre ſi bien pouruû, que ceux meſme qui ſont les plus difficiles a contenter en toute autre choſe, n’ont point couſtume d’en deſirer plus qu’ils en ont. En quoy il n’eſt pas vray ſemblable que tous ſe trõpent : Mais plutoſt cela teſmoigne que la puiſſance de bien iuger & diſtinguer le vray d’auec le faux, qui eſt proprement ce qu’on nomme le bon ſens, ou la raiſon, eſt naturellement eſgale en tous les hommes ; Et ainſi que la diuerſité de nos opinions ne vient pas de ce que les vns ſont plus raiſonnables que les autres,
