A Monsieur
Monsieur le Baron Philippes Sydney, etc.
à Londres
auprès de Monselgnr le Comte de Lecester, son oncle.
Monsieur, ne se trouvant rien en ma puissance que je vous pensse envoyer, pour vous demonstrer la bonne affection que j’ay de vous faire humble service, que ce petit livre que j’ay faict des plantes les plus rares que j’ay observées en mon voyage d’Espaigne, je n’ay voulu faillir de vous en envoyer ung exemplaire par la voye du Me des Postes d’Anvers ; espérant que vous le recevrez aussi humainement que quelque plus grand présent qui vous auroit esté présenté par quelcun plus riche que moy. Ce que je vous prie vouloir faire, et avoir ceste persuasion de moy, que je vous demoureray tousjours humble serviteur en ce qu’il plaira me commander. Il y a jà long temps que n’avons eu aucunes nouvelles de vous, et Monsr Languet s’en est souvent plaindt à moy, me disant qu’estiez devenu paresseux. Je pense bien qu’il n’aura oublié de le reprocher en la lettre qu’il vous écrit, laquelle va joincte à la présente. Vous lui donnerez response à Vre commodité, mais je desireroye que ce fust à la première, à fin de luy oter ceste persuasion.
Au reste je priray Dieu de vous donner, Monsieur, en santé longue vie, avec tout heur et contentement, me recommandant humblement à Vre bonne grâce, comme aussi faict mon hoste le Docteur Aicholz.
De Vienne ce 19 de Mars 1576.
Le Chœus envoyé vers l’Empereur eut hier après midy audience, c’est à dire vint présenter ses lettres à l’Empereur. On pense qu’il soit envoyé pour dénoncer à Sa Mté qu’il ne s’empesche pas des affaires de Polongne.
