Devant la Garde en tel arroy
Qu’il y fist de son corps merveilles,
Car ilz, et cilz qui les vermeilles
Armes portoit, y fisent plus
Pour la journée, voir que nuls.
« Signeur, » ce leur a dit Florée,
« Bonne vous est ceste journée
« Que vous issiés hors de prison ;
« Et pour itant que tant prison
« Le chevalier qui vous delivre,
« — Car c’est par lui que poés vivre —
« Je vous carge et si vous enjoint
« Que vous en alés, sur ce point
« Que vous estes chi delivré,
« Droit a Carlïon la cité,
« Devers le noble roy Artu,
« Et li recordés la vertu
« Dou chevalier au soleil d’or,
« Et dittes bien au roy encor,
« Quant vous serés par devant li,
« C’onques tel chevalier ne vi. »
Cil respondent tout d’une vois :
« Damoiselle, ce sera drois
« Que nous y alons voirement,
« Et que nous recordons briefment
« Les loenges dou chevalier. »
A ces mos leur ala baillier
Florée toutes leurs parures,
Chevaus, lances et armeüres, [1]
Ensi que pour le jour avoient
En devant quant il chevaucoient.
Quant armé furent et garni, f. 68 d
Il se sont de Montgriès parti.
Si chevauceront, ce me samble,
- ↑ 9292 Chevaus, B Chavaus.
