Sans yaus descompagnier d’ensamble,
Tant qu’il aront a court esté
Et au roy Artu recordé
Leur aventure toute entiere,
Sans nulle riens laissier derrière.
ntrues que ceste damoiselle,
Que li livres Florée appelle,
Entendi a ces chevaliers
Mettre a point, ensi que mestiers
Estoit, et que les délivra,
Lansonnès ossi regarda
A la navreüre son mestre
Et com parfonde pooit estre ;
Si l’a tantée et mise a point.
Melyador ne pora point
Pour ceste plaie chevaucier,
Au mieus venir, .i. mois entier,
Car, quant .i. peu fu refroidiés,
Il ne se fust dou bras aidiés
Pour .m. mars ; il n’est pas doubte.
Florée met s’entente toute
A ce c’on songne bien de lui.
Or revenons, je vous en pri,
As .x. chevaliers qui s’en vont.
Bien sçai que tant esploitié ont
Qu’il sont a Carlïon venu
Et droit au peron descendu,
Puis sont ens ou chastiel entré.
Le premier qu’il ont encontré,
Ce fu uns chevaliers courtois
Qui s’appelloit Mars li Galois ;
Les chevaliers tout bellement f. 69 a
Mena vers le roy droitement,
Qui jouoit au jeu des eschès.
Page:Froissart - Méliador, tome 1.djvu/348
Le texte de cette page a été corrigé et est conforme au fac-similé.
268
Méliador
