« Desur le buc la teste perdre en deit :
3290 « Trestut seit fiz, n’i avrat altre dreit. » Aoi.
CCLXVII.
Granz sunt les oz e les eschieles beles,
Entr’els nen ad ne pui ne val ne tertre,
Selve ne bois ; ascunse n’i poet estre ;
Bien s’entreveient en roi la pleine tere.
3295 Dist Baliganz : « La meie gent averse,
« Kar chevalchiez pur la bataille querre ! »
L’enseigne portet Amboires d’Oluferne.
Païen escrient, Preciuse l’apelent.
Dient Franceis : « De vus seit hoi grant perte ! »
3300 Mult halternent Munjoie renuvelent.
Li Emperere i fait suner ses graisles
E l’olifant ki trestuz les esclairet.
Dient paien : « La gent Carlun est bele.
« Bataille avrum e adurée e pesme. »Aoi.
CCLXVIII
3305 Grant est la plaigne e large la cuntrée :
Mult est grant l’ost ki i est asemblée.
Luisent cil helme as pierres d’or gemmées ;
E cist escut, e cez brunies safrées,
E cist espiet, cez enseignes fermées.
Sunent cist graisle, les voiz en sunt mult cleres
3310 De l’ olifant haltes sunt les menées.
Li Amiralz en apelet sun frère,
Ç’ est Canabeus, li reis de Floredée :
Cil tint la tere entresqu’en Val-Sevrée,
Les dis eschieles Carlun li ad mustrées :
3315 « Veez l’orgoill de France la loée.
« Mult fièrement chevalchet l’Emperere :
« Il est derere od cele gent barbée ;
« Desur lur brunies lur barbes unt getées
