à ceste necessité, attendant que je les aye faitz payer. À quoy je travaille et m’employe, de sorte qu’ils se peuvent asseurer qu’ilz le seront, s’ils ont ung peu de patience. De quoy je vous ay bien voulu advertir et vous prier d’y tenir la main, ce pendant que je fais donner ordre au dict payement. Ce que m’asseurant que vous vouldrez faire, je ne vous en diray davantage, si ce n’est pour vous asseurer de ma bonne volonté et prier Dieu vous avoir, Monsr Melon, en sa saincte et digne garde. De Pau, ce xxiije mars 1584.
Orig. — Arch. de M. le comte H. C. de Meslon. Envoi de M. le secrétaire général du département de la Gironde.
Monsr Melon, J’ay faict entendre au cappitaine Boisrenard ce qu’il est besoing de faire pour faire vivre la garnison de Montsegur. Je vous prie tenir la main en cella. J’en ay escript à monsr le mareschal, afin qu’il n’y donne point d’empeschement, mais plustost qu’il y ayde ; j’en ay parlé à monsr de Bellievre ; j’en ay escript au Roy mon seigneur : de sorte, qu’attendant la response, il fault donner ordre que les choses se portent bien, et que les soldatz n’entrent point en telles alterations, comme j’entends quelques fois que ilz font. Car j’ay soing d’eulx aultant que d’aultres quelconques, et comme si c’estoit mon propre faict. M’en remectant sur ce que vous en dira le dict cappitaine Boisrenard, je ne vous feray plus longue lettre, si ce n’est pour prier Dieu vous avoyr, Monsr Meslon, en sa saincte et digne garde. De Pau, ce xxxje mars 1584.
