Orig. — Arch. de M. Melchior de Marion-Gaja, de Castelnaudary. Copie transmise par M. Moquin-Tendon, professeur à la faculté des sciences de Toulouse.
À MONSR JACQUES DE MARION,
Monsr de Marion, J’ay entendu[1] le refus que ceux qui sont au lieu de la Planque[2] ont faict au commandement que le sr de Clervant leur a faict de ma part de quitter et rendre le dict lieu suivant l’edict de pacification et articles des conferences, et le pouvoir que j’ay donné audict sr de Clervant pour l’execution dudict edict ; ce que j’ay trouvé bien estrange et de pernicieuse consequence pour les aultres places qui se doibvent rendre : de quoy ils sont grandement à reprendre et meritent un grief chastiment. En quoy tous gens de bien et amateurs du bien de cest Estat doibvent intervenir pour moyenner et faire reparer la faulte qu’ils ont faicte, de laquelle, oultre le service du Roy mon seigneur, et l’interest public, j’ay occasion de me ressentir, voyant ainsi mon auctorité et mes commandemens, portez par un personnage honnorable, comme est le dict sr de Clervant, tomber en mespris entre ceulx qui y doibvent rendre toute obeïssance. En quoy ils montrent bien qu’ils sont trés mal conseillés et ne considerent point le mal qui leur en peut advenir. Et pour ce que j’ay sceu que vous pouvez beaucoup pour les faire condescendre à leur devoir, je vous ay bien voulu faire la presente pour vous prier d’entreprendre et moyenner la reddition du dict lieu de la Planque, leur proposant leur faute et le mal qui leur peut advenir, s’ils n’en vuident. Car pour moy et pour mon debvoir il fauldroit que j’employasse contre eulx tous les moyens que j’aurois, et que je fisse joindre les forces de ceulx de la Religion à celles de monsr de
