Cette page n’a pas encore été corrigée
Étoient-ce impressions qui peussent aveugler
Un jugement si cler ?
Non, non, elle a bien fait de m’estre favorable,
Voyant mon feu si grand et ma foy si durable,
Et j’ay bien fait aussi d’asservir ma raison
En si belle prison.
C’est peu d’experience à conduire sa vie,
De mesurer son aise au compas de l’envie,
Et perdre ce que l’âge a de fleur et de fruit
Pour éviter un bruit.
De moy, que tout le monde à me nuire s’appreste,
Le Ciel à tous ses traicts face un but de ma teste :
Je me suis résolu d’attendre le trepas,
Et ne la quitter pas.
