faict de couppeaulx, que nul n’arrestoit devant luy qu’il ne ruast contre terre, dont à la rupture de ces harnoys pierreux fut faict ung si horrible tumulte, qu’il me souvint, quand la grosse tour de beurre qui estoit à sainct Estienne de Bourges, fondit au soleil. Et Panurge ensemble Carpalim et Eusthenes ce pendant esgorgetoient ceux qui estoient portez par terre. Faictes vostre compte qu’il n’en eschappa ung seul et à veoir Pantagruel sembloit ung faulcheur, qui de la faulx (c’estoit Loupgarou) abbatoit l’herbe d’un pré (c’estoient les geans). Mais à ceste escrime, Loupgarou perdit la teste, ce feut, quand Pantagruel en abbatit ung, qui avoit nom Moricault, qui estoit armé à hault appareil, c’estoit de pierres de gryphon, dont ung esclat couppa la gorge tout oultre à Epistemon : car aultrement la plus part d’entre eulx estoient armez à la legiere, c’estoit de pierres de tuffe, et les aultres de pierre ardoysine. Finablement voyant que tous estoient mors, getta le corps de Loupgarou tant qu’il peut contre la ville, et en tombant du coup tua ung chat bruslé, une chatte mouillée, une canne petiere, et ung oyson bridé.
Comment Epistemon qui avoit la teste tranchée, fut guery habillement par Panurge. Et des nouvelles des diables, et de damnez.Cha. xx
ESTE desconfite gygantale parachevée Pantagruel se retira au lieu des flaccons, et appela Panurge et les aultres, lesquelz se rendirent à luy sains et saulves, excepté Eusthenes qu’ung des geans avoit esgratigné quelque peu au visaige, ainsi qu’il l’esgorgetoit. Et Epistemon qui ne comparoit point.
