Vos yeux ne font-ils pas tout ce qu’ils veulent faire ?
Et vous ne vouliez pas ſans doute luy déplaire.
Mais que puis-je, Seigneur ? On a promis ma foy.
Luy raviray-je vn bien, qu’il ne tient pas de moy ?
L’Amour ne regle pas le ſort d’vne Princeſſe.
La gloire d’obeïr eſt tout ce qu’on nous laiſſe.
Cependant ie partois, & vous auez pû voir
Combien ie relaſchois pour vous de mon deuoir.
Ah ! que vous ſçaviez bien, Cruelle… Mais, Madame,
Chacun peut à ſon choix diſpoſer de ſon ame.
La voſtre eſtoit à vous. I’eſpérois. Mais enfin
Vous l’auez pû donner ſans me faire vn larcin.
Ie vous accuſe auſſi, bien moins que la Fortune.
Et pourquoy vous laſſer d’vne plainte importune ?
Tel eſt voſtre deuoir, ie l’auouë. Et le mien
Eſt de vous épargner vn ſi triſte entretien.
