Page:Raoul - Trois satiriques latins, vol 1 Juvénal, 1842.djvu/158

Nauseat, atque oculis bilem substringit opertis.
 
Illa tamen gravior, quae, cum discumbere coepit,
Laudat Virgilium, periturae ignoscit Elisa :
Committit vates et comparat ; inde Maronem,
Atque alia parte in trutina suspendit Homerum.
Cedunt grammatici, vincuntur rhetores, omnis
Turba jacet, nec causidicus, nec praeco loquatur,
Altera nec mulier ; verborum tanta cadit vis !
Tot pariter pelves, tot tintinnabula dicas
Pulsari. Jam nemo tubas, nemo aera fatiget :
Una laboranti poterit succurrere Lunae.
Imponit finem sapiens et rebus honestis. ³⁶
Nam quae docte nimis cupit et facunda videri,
Crure tenus medio tunicas succingere debet,
Caedere Sylvano porcum, quadrante lavari ³⁷
Non habeat matrona, tibi quae juncta recumbit,
Dicendi genus ; aut curtum sermone rotato
Torqueat enthymema, nec historias sciat omnes :
Sed quaedam ex libris et non intelligat. Odi