Page:Raoul - Trois satiriques latins, vol 1 Juvénal, 1842.djvu/218

Et cum venali Cyane succincta lagena.
 
Defensor culpæ dicet mihi : Fecimus et nos
Hæc juvenes. Esto : desisti nempe, nec ultra
Fovisti errorem. Breve sit, quod turpiter audes
Quædam cum prima resecentur crimina barba :
Indulge veniam pueris. Damasippus ad illos
Thermarum calices inscriptaque lintes vadit,
Maturus bello, Armeniæ Syriæque tuendis
Amnuibus, et Rheno atque Istro : præstare Neronem
Securum valet hæc ætas. Mitte ostia, Cæsar,
Mitte ; sed in magna legatum quære popina ;
Invenies aliquo cum percussore jacentem,
Permistum nautis, et furibus ac fugitivis,
Inter carnifices et fabros sandapilarum,
Et resupinati cessantia tympana Galli.
Æqua ibi libertas, communia pocula, lectus
Non alius cuiquam, nec mensa remotior ulli.
Quid facias talem sortitus, Pontice, servum ?
Nempe in Lucanos aut Tusca ergastula mittas. ⁹
At vos, Trojugenæ, vobis ignoscitis ; et quæ
Turpia cerdoni, Volesos Brutosque decebunt.

Quid, si nunquam adeo fœdis, adeoque pudendis
Utimur exemple, ut non pejora supersint ?
Consumptis opibus, vocem, Damasippe, locasti
Sipario, clamosum ageres ut Phasma Catulli. ¹⁰