et Robins li fils Fouchier
i ait fait grant asemblee,
ki d’un baston de pomier
m’ait la chine mesuree ;
pues m’ait dit en reprovier
’vasauls, retorneis airrier,
n’en moinres nostre espousee.’
DE Saint-Quentin a Cambrai
chevalchoie l’autre jour.
lés un boisson esgardai,
touse i vi de bel atour :
la colour
ot fresche com rose en mai.
de cuer gai
chantant la trovai
ceste chansonnete :
’en non Deu, j’ai bel ami,
cointe et joli,
tant soie je brunete.’
Vers la pastoure tornai,
quant la vi en son destour,
hautement la saluai,
et dis ’Deus vos doinst bon jour
et honour !
celle ke ci trové ai,
sans delai
ses amis serai.’
dont dist la doucete :
’en non Deu, j’ai bel aml
cointe et joli,
tant soie je brunete.’
Deles li seoir alai,
et li priai de s’amour.
celle dist ’Je n’amerai
vos ne autrui par nul tour,
