Douce Dame plaine de grâce,
Tant sui dolenz ne sai que face
De ce que tant t’ai corrouciée !
Se tu vers moi iez aïriée[1],
Douce Dame, tu as grant droit.
Bien sai que bien déust luès droit
Desor mes piez la terre fendre
Et feu d’enfer ma langue esprandre,
Que renoiai ton Fil et toi.
Douce Dame, ce poise-moi ;
Douce Dame, n’en puis plus fère ;
Douce Dame, tout mon afère
Sés bien et voiz, or t’en convien-ge :
Moi n’en chaut que li cors deviengne,
Bele et douce piteuse Dame,
Mès que merci aiez de m’âme.
Douce Dame, que qu’aie fet,
Ge me repent de mon meffet.
Dame, se ne fust repentance,
Jeusne, aumone et pênitance,
A mau port fussent arivé
Cil et celes de Ninivé ;
Raab, qui tant fut pécheresse,
Légière, fole, lécherresse,
Jamès merci ne recouvrast
Se pénitance n’i ouvrast.
Se pénitance m’éust fait
A David pès du grand meffet
Qu’il fist d’Urie por la fame,
Que eust-il fet, ma douce Dame ?
Que r’eust fet, Dame, saint Pierre,
Qui tant fu durement pechière
Et qu’anemis tant forvoia
Que Dieu par .iij. foiz renoia ?
Saint Cypriens, ma douce Dame,
Qui fist à mainte enceinte fame
Trère et sachier l’enfant du cors,
Se Dieu ne fust miséricors
Et pénitance n’i vasist[2],
Où alast ne que devenist ?
Page:Rutebeuf - Oeuvres complètes, recueillies par Jubinal, tome II, 1839.djvu/307
Le texte de cette page a été corrigé et est conforme au fac-similé.
300
NOTES
