siers sont les mellours fontainnes et li millour flun ki soient el monde ; et outre les désiers sont li Grieu, des queus nous recevons le tréu de .vij. ans en .vij. ans par nos houmes. Et saciés que se li Gaiant avoient sens de batillier, il se poroient bien combatre à tout le monde ; mais nostre Sires leur a dounet tel don qu’il ne s’entremaitent fors de labourer, pour çou que leur ancissour vorrent abatre le ciel pour le tour que fonda Babiel, qui estoit leur sires ; mais nous en avons plusiours en nostre chartre et en nostre court, et sont bien liié à boines kaines de fier, et les gens les vienent regarder ausi coume biestes sauvages. En nostre tierre prent-on .i. poisson rouge coume sanc, dont on taint le pourpre. Et saciés que nostre palais est fais à la manière dou palais au roi Godefroi d’Inde, dou quel mesire saint Thumas bénéi les très et les cheverons et les ordena ; et sont d’un bosc que on claimme occinon, et la couverture de Liban ki ne puet ardoir ; et sour le palais a .ij. escarboucles et .ij. pumiaus d’or, pour çou que li ors resplendist de jour et les escarboucles de nuit ; et les plus grans portes de nostre palais sont de cenistres meslées avoeques sardines, et les portes ont tel viertu que nus ne puet metre dedens mauvais viers, et les autres portes sont de Liban, et li fenestages est de cristal, et les tables sour quoi nous mengons, les unes sont de ramon ouvrées à or, et les autres d’amatistes, et li piles ki les soustienent sont d’ivoire ; et devant nostre palès a une place, où nous soumes quant nous volons véir les joveuenchiaus jouer et batillier. Cist nostre palais est fès d’une piere ki est apielée onichinon, et de tel piere sont tout li piller ki sont en cele place, pour çou que li joveuenciel aient les cuers plus séurs et plus hardis. Et la cambre où nous gisons est aournée d’or et de pieres pré-
