Page:Rutebeuf - Oeuvres complètes, recueillies par Jubinal, tome II, 1839.djvu/474

467

ADDITIONS.

cieuses, et une lampe art en nostre cambre de nuit plainne de bausme. Et en .i. autre palais où nos tenons nostre court as fiestes anueus, en art une autre ki rent moult boine oudour, et li lis où nos gisons est plains de safirs pour çou ke nous aions la viertu de castée. Et ne pourquant si avons-nous bieles femmes ; mais nous ne gisons à eles que .iij. mois en l’an, en espérance d’engenrer. Et .xxx. mil homme manguent cescun jour en nostre court sans les trespassans, et trestout prendent leur despens en notre court cescun jour ; et la mestre table sour laquele nous mengons est d’esmeraudes et siet sour trois pilers d’amatistes, et la viertus de cel piere est teles que nus ne puet estre yvres en mengant. Et si avons devant nostre palais ordenet un mireoir d’argent cler ki moult est biaus, et le voient bien les gens, de nuit et de jours, de .vij. jornées loins de la chité ; et i convient monter par .c. et .lxvij. degrés, et l’une partie des degrés est faite à pierres précieuses, et la seconde partie est de crestal, de jaspes, de sardines, et l’autre tierce partie de pourfires, de sierpentines et d’enlabastres ; et sus ces degrés tot amont est uns fors pilers et haus, et sour cel piler est une fors coulombe, et sour cele coulombe siet uns fors capitiaus, et sour le capitiel siéent .xxxij. coulombes, et sour ces coulombes siéent .iij. capitiel, et sour ces capitiaus siéent .lxiiij. coulombes petites et sour ces coulombes siet .i. capitiaus, et sour cel capitiel siéent .xxxij. coulombes très petites, sour lesqueles a .viij. capitiaus ; et sour ses capitiaus siet li souverainne coulombe, sour laquele li mireoirs est assis par engien, que nus ne l’ poroit savoir fors cil ki establi le monde ; et cil ki montent amont apierçoivent bien et voient coument les coulonbes siéent et li capitiel ; et saciés que nus n’i ose monter devant cele eure