Page:Rutebeuf - Oeuvres complètes, recueillies par Jubinal, tome II, 1839.djvu/486

479

ADDITIONS.

Bien doit parler d’amors qui bien set que ce monte,
C’onques n’oï parler ne de roi ne de conte
S’il ama par amors, ainsi comme l’en en conte,
Qu’el chief ou en la queue n’éust .i. mès de honte.

Bien avez oï dire, seignor, et entendu
Coart est qui ne trait quant son arc a tendu.
Ce qu’avoie entesé ne vos ai pas rendu ;
Mais or le vos rendrai, n’i aura atendu.

Ge di que cil sont fol qui d’amer s’entremetent :
Assez en voi de çax qui por amer s’endestent.
Celes prennent sanz rendre qui les musars abestent ;
Por ce tieng-ge por fols cil qui le lor i metent.

Amor sanz vilénie c’est amor bienséant :
Autre amor ait dahez, quar trop est meschéant ;
Ne cele amor n’ert jà à l’autre amor séant,
Dont cil qui est desus est toz jors recréant.

Que valt à chevalier à ferir en quintaine
Où adès puet ferir et adès remaint seine ?
Ausi fait cil qui aime ; il verse en la fontaine
Où toujours puet verser : ne sera jamais plaine.

Mult par est fox li feures qui forge sor l’enclume :
Tantis .ij. marteax comme li feu alume,
Mais d’itant a la forge une male costume
Quant li pertuis eslaise et la fornèse fume.

Amor saut, amor point, amor asprement mort ;
Amors sanz deffier a jà maint home mort.
Qui en amer les dames s’acostume et s’amort,
Bien porchace sa honte, son domaige et sa mort.

Por ce est fox de teste, ne de sens n’a demie.
Qui plus aime les femes et qui plus les amie,