Page:Rutebeuf - Oeuvres complètes, recueillies par Jubinal, tome II, 1839.djvu/487

480

ADDITIONS.

Tant com plus jure et dit que ele est s’amie,
Tant fet-el mains à croire et dit qu’il ne l’est mie.

Fox est qui feme croit se mult n’est sage et bone :
Feme par son bobant met arrier et soone
Celui qui plus la sert et du sien plus li done,
Et qui plus li fait honte, à celui s’abandone.

Feme n’amera jà, si m’aïst Diex et seqeure,
Celui qui por s’amor plaint et soupire et pleure ;
Mais cil qui bien la bat et qui en li deveure,
Celui aime-ele et prise, et tient chier et honneure.

Feme est de mal atret et de male nature,
Quant à celui qui l’aime ne pensse ne n’a cure ;
Mais celui qui li fait vilénie et laidure,
En celui met son cuer et sa peine et sa cure.

Bien, amor et hennor faut par feme et avorte.
Jà feme n’amera qui fin amor li porte ;
Mais celui qui la bat tant qu’il la laist por morte,
A celui se déduit et solace et déporte.

L’amor a en la langue feme et le sens en l’oeil :
C’est la beste où il a mains sens et plus orgueil ;
Quar quant plus li feroiz bel semblant, bel acueil,
Lors la verroiz plus fière que n’est lions sor sueil.

L’amors ne la haïne ne prise pas .i. pois,
Et se ge l’ai prisiée, ç’a esté sor mon pois.
Sens de feme et bontez poise bien au droit pois
A la valor des vins du vignou d’Estampois.

Se li vins valent pou, sens de feme valt mains ;
Quar, puis que la chalor li est entrée ès rains :
Ne se garde de riens qu’el puist tenir as mains ;
Ne li chalt quel qu’il soit, chevalier ou vilains.