autres parties du corps, pour se pouuoir defendre des coups de Flesches : car elles sont faictes à l’espreuue de ces pierres aiguës ; et non toutefois de nos fers de Kebec, quand la Flesche qui en est accommodée sort d’vn bras roide et puissant, comme est celuy d’vn Sauuage : ces cuirasses sont faictes auec des baguettes blanches, coupées de mesure, et serrées l’vne contre l’autre, tissues et entrelassées de cordelettes, fort durement et proprement, puis la rondache ou pauois, et l’enseigne ou drappeau, qui est (pour le moins ceux que i’ay veus) vn morceau d’escorce rond, sur lequel les armoiries de leur ville ou prouince sont depeintes et attachées au bout d’une longue baguette, comme vne Cornette de caualerie. Nostre Chasuble à dire la saincte Messe, leur agreoit fort, et l’eussent bien desiré traiter de nous, pour le porter en guerre en guise d’enseigne, ou pour mettre au haut de leurs murailles, attachée à vne longue perche, afin d’espouuenter leurs ennemis, disoient-ils.
Les Sauuages de l’Isle l’eussent encore 207|| bien voulu traiter au Cap de Massacre, ayans desia à cet effect, amassé sur le commun, enuiron quatre-vingts Castors : car ils le trouuoient non seulement tres-beau, pour estre d’vn excellent Damas incarnat, enrichy d’vn passement d’or (digne present de la Reyne), mais aussi pour la croyance qu’ils auoient qu’il leur causeroit du bon-heur et de la prosperité en toutes leurs entreprises et machines de guerre.
Comme l’on a de coustume sur mer, pour signe de guerre, ou de chastiment, mettre dehors en euidence le Pauillon rouge : Aussi nos Sauuages, non seulement és iours solennels et de resiouyssance, mais
