de Soldats meſlez enſemble ; ſans ordre & ſans Chefs, qui demandoient Artamene. Une action ſi hardie obligea encore Thiamis à vouloir dire quelque choſe au Roy : mais il le rebuta tout en colere, & parut encore plus irrité. De ſorte qu’Ariobante envoya Megabiſe adroitement advertir le Roy de Phrigie, que rien ne fléchiſſoit Ciaxare. Cependant quoy que Thiamis euſt eſté refuſé, il ne voulut point ſortir du Chaſteau, & demeura dans une autre chambre : eſperant touſjours de trouver quelque moment favorable, qui le feroit mieux eſcouter. Durant cela Metrobate fut adverty que l’Armée entiere eſtoit aux portes de la Ville, qui vouloit qu’on les luy ouvriſt : il voulut d’abord cacher cette mauvaiſe nouvelle au Roy, mais il falut enfin qu’il la sçeuſt : de ſorte que ce Prince fut en un eſtat le plus eſtrange que l’on ſe puiſſe imaginer. Il eſtoit dans un Chaſteau avec peu de monde, & dans une Ville ſouslevée, de qui les portes eſtoient gardées par des gens qui eſtoient veritablemen à a luy : mis qui eſtoient attaquez dehors par une Armée de cent mille hommes, & dedans par une grande partie des habitans. Cependant dans l’aveuglement où il eſtoit, il accuſoit encore Cyrus de tous ces malheurs : & ne conſideroit pas qu’il n’en eſtoit que la cauſe innocente. Jamais il ne s’eſt rien veû de pareil, ny au dehors ny au dedans d’une ville : toute l’Armée faiſoit retentir l’air du glorieux nom d’Artamene, & de celuy de Cyrus : les Soldats de Metrobate qui deffendoient les Murailles, n’avoient pas peu d’occupation : car on voyoit à la fois cent échelles dreſſées contre ces Murs, ſur leſquelles des Soldats couverts de leurs Boucliers, & formant cette eſpece de Bataillon que les Anciens appelloient Tortuë, ſe preſſoient pour
