ait empeſché. Le Roy ſe trouva alors fort troublé : neantmoins ne voulant pas ſe fier tout à fait au diſcours de cet homme, il envoya chercher par tout dans le Chaſteau ſi on ne trouveroit point Metrobate : ou s’il n’auroit point eſté tué, par ceux qui avoient delivré Cyrus. Mais il sçeut que Cyrus avoit eſté delivré, ſans qu’il y euſt eu de reſistance : parce que l’on ne s’en eſtoit aperçeu qu’apres. Il sçeut meſme que lors que Metrobate eſtoit allé la ſeconde fois à la Chambre de Cyrus, ç’avoit eſté avec intention de le faire tüer, quoy qu’il n’en euſt point eu d’ordre : & que l’ayant trouvé ſauvé, il s’eſtoit en effet ſauvé luy meſme, de la façon dont le Soldat l’avoit dit. Quoy Seigneur, reprit Thiamis, vous reſisterez encore au Ciel & à la Terre ? & vous ne voudrez pas voir l’innocence de Cyrus, en voyant le crime de Metrobate ? Je sçay bien (reſpondit Ciaxare tout hors de luy meſme) que Cyrus eſt genereux : mais je ne voy pas auſſi clairement qu’il ſoit innocent. Comme il en eſtoit là, il vit entrer Marteſie, Chriſante, Feraulas, Araſpe, Artucas, Andramias, & Ortalque : car dans la frayeur qui avoit ſaisi les Soldats depuis que Metrobate s’eſtoit ſauvé, qui ſeul les avoit mis dans le Chaſteau, ils avoient abandonné le ſoing de leurs Priſonniers. Ciaxare tout ſurpris de cette veuë, & ne sçachant s’il eſtoit en ſeureté de ſa perſonne parmy tant de gens qu’il avoit mal-traitez ; ſe tint pourtant aſſez ferme : & demanda fierement à tous ces gens qui l’environnoient s’il n’eſtoit plus Roy ? puis qu’ils avoient la hardieſſe de perdre le reſpect qu’ils luy devoient. Seigneur, reprit Chriſante, voyant que nos Gardes nous abandonnoient, nous avons bien jugé que voſtre Majeſté auroit peut-eſtre beſoin de nous : & j’ay creû, adjouſta Marteſie,
