du temps qu’il eſtoit Artamene : & de ce que ce meſme Artamene venoit de faire en ſa preſence ſous le nom de Cyrus : il calma enfin ſon eſprit, & commanda qu’on le fiſt entrer. Marteſie ſuivie de la Fille qui l’accompagnoit voulut ſortir du Cabinet du Roy : Mais Ciaxare la retenant, non non, luy dit il, Marteſie, il faut que vous ayez voſtre part à la paix, comme vous l’avez euë a la guerre. Un moment apres le Roy de Phrigie entra, qui voulut dire quelque choſe au Roy pour s’excuſer : mais Ciaxare luy prenant la main & la luy ſerrant : ne parlons point d’excuſe, luy dit il ; car j’en aurois plus à vous faire de ne vous avoir pas creû, que vous ne m’en devez de ne m’avoir pas obeï. Le ſage Thiamis ſuivit d’aſſez prés le Roy de Phrigie, conduiſant Cyrus qu’il preſenta à Ciaxare : ce Prince voulut alors ſe jetter à ſes pieds, comme s’il euſt eſté criminel, tant le Pere de Mandane eſtoit reſpecté de luy : mais le Roy l’en empeſchant, le releva en l’embraſſant tendrement : & luy demanda ſi Cyrus pourroit bien oublier toutes les injures que l’on avoit faites à Artamene ? Artamene n’oubliera jamais vos biens-faits, luy repliqua t’il, & ne ſouffrira pas que Cyrus ſoit jamais ingrat. Mais Seigneur, pourſuivit il, je ſupplie tres humblement voſtre Majeſté, aujourd’huy que je puis reſpondre preciſément à tout ce qu’elle me peut demander, & ſans luy rien déguiſer de la verité : de me faire l’honneur de me dire, s’il luy demeure quelque ſoubçon de ma fidelité ? & ſi elle m’accuſe encore d’avoir manqué au reſpect que je luy devois : puis que ſi je ne la ſatisfais pas pleinement par mes raiſons, je ſuis encore tout preſt de ſubir tel chaſtiment qu’il luy plaira de m’ordonner. Car Seigneur, quelques ſentimens que l’on vous ait donnez de Cyrus, je
