ſubitement malade, & ſi ie ne pouuois tirer de luy aucun ſigne de douleur de ſes pechez, eſtant entré en reſuerie : Dieu voulut que le lendemain il ſe confeſſa de bõ ſens, & mourut fort biẽ : le iour d’apres no’ enſeueliſmes noſtre Frere en l’Egliſe de noſtre Dame prés de la Citadelle, faiſant l’office ſelõ la couſtume de la Compagnie, non plus ny moins que ſi nous euſſions eſté en quelque College. Le lieu où nous le miſmes ce fut deuant l’Autel au milieu, où le Preſtre commance la Meſſe, en la meſme place en laquelle pluſieurs années deuant, nos Peres enſeuelirent vn autre des noſtres qui auoit eſté conſacré Eueſque du Iappon, la Chapelle on la nomme en Portugais, Noſſa Senhora do Boluarte. I’eſcris cecy, afin que ceux des noſtres, qui viendront icy apres, le ſçachent. Eſtans donc en attente enuiron le 10. ou 12. d’Aouſt, voila que ſans y penſer & tout d’vn coup la flotte des Hollãdois, la meſme que deuant, apparoiſt ſur mer. Mais ie m’oublie de vous dire, ce que deuint la nauire de S François, qui auoit eſté emportée par la tempeſte. Elle vogua comme elle peut iuſques au Mozambic : mais deuant que comparoiſtre, les vẽts la repouſſent ſur des rochers, à douze lieuës ou plus du Mozambic, qui ne
