disciplines qu’il s’estoit données ; d’estre à genoux continuellement, il en avoit de grandes playes. Dieu permist qu’il fust despouillé en public, afin que sa penitence fust reconnue et manifeste.
Voicy un exemple où l’on peut gouster quel est le succez de la felicité humaine, et quel poison c’est que les richesses qui s’y peuvent posseder, car Dieu dispose de l’advenir, et rabaisse assez souvent l’orgueil de ceux qui, eslevez au sommet de quelque dignité, veulent braver sa divinité et mescognoistre la cause dont ils ne sont qu’un petit effet. Dieu veuille mesurer sa misericorde à l’aspresté de sa penitence, et lui donner son paradis ! Mandement et execution fut donné contre dom Rodrigue pour deux cens soixante et douze millions cent soixante et deux mil neuf cens soixante et quatre maravedis, qui valent en France 887066 escus, aux condamnations pecuniaires, les joyaux et meubles de la maison appliquez à Sa Majesté, qui ont esté appreciez à cent quatre vingt mil ducats, qui valent 165000 escus.
Il estoit marquis des Sept Eglises, comte de la Oliva, commandeur de Ocana en l’ordre de Sainct-Jacques, capitaine de la garde allemande, concierge de la maison d’Arragon, greffier en la chancellerie de Valladolid, tresorier des ouvrages de la dite ville, grand prevost, et sergent mayeur, concierge de la prison royale, et avoit deux regimens, avec voix et place au conseil, et en la première antiquité ; il estoit grand courrier de la dite ville, et avoit un maravedy de chacune bulle de la croisade qui s’imprime à Valladolid, qui se monte à plus de six mil ducats de rente, qui valent, monnoye de France,
