saintuaires[1] et les croiz et les texstes des sains Evangiles. Et ovoc aus, estoit grant plenté dou pople de la vile et dou païs environ. Quant icele escomenié torbe de Brebançons vit les moines venir contre aus ensi apareliez, si lor corurent sus et les despoilierent toz des sainz vestemenz ; et à la maniere de bestes sauvages et de lex enragiez qui courent à quelque viande que il trovent, quant la famine les destraint, corurent cele gent escommeniée aus barons et aus borgois, et en occidrent bien largement juques à Vc ou plus.
La renomée de cete grant felonie, qui ainques mais n’avoit esté oïe juques aujord’ui, s’epandi par diverses contrées et vint jusques en France au roi Loois. Et tantost com il l’ot oïe, si fu toz echaufez de pitié et de compassiom, por la bonté de Dieu et de sainte Eglise, de prendre vanjence de cete outrageuse cruauté. Tantost bani[2] ses oz et sa hasta d’aler contre ce cruel tirant por li destruire. Et li daloiaus, quant il sot la verité de la venue le roi et de son ost, si ne l’ousa atendre, ainz guerpi sa terre come fuitis. Et si come li rois passoit parmi la province de la terre de Cligni atot son ost, les fames et les borgoises qui remeses[3] estoient veves de lor segnors par cele guerre, li valetom[4] et les puceles qui chau estoient en orphente[5], li venoient à l’encontre et li chaoient tuit aus piez plo-
