rant et criant à hauz criz, et li monstroient lor perte et lor grant domage, et li prioient que il aust pitié et merci d’aus et que il maist consel en lor afaire que si aloit malement. Tant li didrent ilueques que il emurent le roi et tot son ost juques aus plors, et les encoragierent plus et plus de destruire cele escomenié gent ; ne ce ne fu pas merveile, car tu vaisses ilueques les petiz orphelins qui encores alectoient et pandoient aus mameles des meres, et les puceles orphelines et desconfortées des soulaz de lor peres, que cele daloial gent avoient occis, crier et plorer trop doulerousement. Tu n’oïsses pas Dieu tonant, tant estoit li airs raempliz de plors et de criz et de braieries de petiz enfanz. Que diroie-je plus ? Li rois toz eschaufez de porsivre son propos, s’en entra en la terre à cel escomenié conte de Chalom, et sanz nul chalenge, et sanz nul destorbier, prit le mont Saint Vincent[1] et puis Chalom, et toute la terre à ce tyrant, et en haila la moitié au duc de Bourgoigne et l’autre au conte de Nevers. Des daloiaus Barbançons fit tel joutise, que il n’am pot ainques tant tenir ne prendre que il ne pendit à forches tot maintenant. Un en i out qui vout sa vie reimbre[2] de grant avoir ; mès ainques li rois ne l’an vout escouter, ainz commanda que il fut penduz ovoc les autres en vangence de sainte Eglise. Après cete noble vangance, s’en retorna li rois en France.
