trop durement haoient lor segnorie, les asaloient trop durement et lor traoient d’ars et d’aubaletes. Et si longuement les tindrent enclos par lor grant afort que pains lor faili et que il ne vivoient se de chars non. Et à ce furent mené li moine, que une partie d’aus faisoit le guet par nuit, et l’autre partie lassée de defendre, se dormoit tant come ele avoit de loisir. Grant piece furent ensi en tel destrece ; et quant li abbés vit que si daloial borgois ne se refrenoient de riens de lor felonie, ainz ne faisoient se enforcer non plus et plus d’aus asalir, si out consel ; et conduit par ses amis, en repot s’en issi et s’en ala au roi Loois qui lors estoit à Corbie[1] ; sa clamor fit de ses borgois maimes, qui comune avoient faite contre li, et asis l’avoient en sa maisom maimes, et li faisoient tant de gries com il pooient. Quant li rois en fu certains et par l’abbé et par autres, si envoia l’evesques de Langres[2] au conte de Nevers qui cele comune maintenoit, et li manda que il l’eglise de Vezelai tenit en pais et fait la comune depecier. Mais li cuens, qui trop estoit orguelox, mit arriere dos le commandement le roi, car les borgois de Vezelai ne devea[3] ne ne destorba de riens de lor foule emprise.
Et quant li rois vit ce, si asembla son ost toz entalentez de vanchier l’eglise et le depit que li cuens faisoit de son commandement contredire ; si chevaucha par grant dedaign contre le conte. Li cuens qui sot sa
