à Nostre Segneur, que il seroient toz jors mais en amor et en concorde li uns vers l’autre. Et en signe et en tesmoignage de cele reconciliation que il avoient faite, il firent enpreindre en estaim le seel de cele scedule o tot l’ymage de Nostre Dame, et le portoient ovec eus cousu seur chaperons blans, qui estoient taillié à la maniere de chapulaires que cil convers de ces abbaïes blanches portent[1]. Et plus grant merveille ; que tuit cil qui ces segniaus portoient estoient si seur, que se il avenist par aventure que aucuns eust un home occis, et il encontrast le frere de celui qui fust morz et seust encores bien la mort de son frere, il meist tot en obli pour lui festier et le receust entre ses braz en baisier de pais et d’amor o plors et o lermes, et li donast à mengier et à boire en sa maison et toutes ses neccessitez[2]. Et cele pais qui fu faite ou païs par ce preudome dura moult longuement.
- ↑ Latin : « Sigillum beate Virginis predictum in stanno impressum et pectori superpositum cum caputiis linteis albis ad modum scapulare monachorum alborum factis. »
- ↑ Le royal ms. 16 G VI, fol. 334, ajoute en note pour traduire un passage de Rigord omis par Primat : « Ne fu pas bien la prophecie Ysaie adcomplie en ce fait où il dit que le leu avec l’aigneil et le liepart avec le chevrel se reposera. Le veel, le lyon, l’ouaille et l’ours paistront ensemble » (Isaïe, chap. XI, verset 6). « Par ces crueuses bestes qui vivent de chars et de rapines sont entenduz les mauvais hommes homicides et robeurs. Par les bestes debonnaires dessus nommées, les simples et debonnaires personnes, desquelz dit le prophete que Jhesu Crist les fait ensemble habiter en bonne pais ; et pourquoy ? « Car la terre est raemplie de la science Dieu » (Isaïe, chap. XI, verset 9).
