que on apele Boves[1], les charetes, li chars, li cheval et les genz de son ost defolerent et debrisierent si forment toz les blez qui entor l’ost estoient, et li garçon, qui moult en soierent[2] pour leur chevaus, que il en i demora petit qui ne fussent marchié et triblé[3]. Si avint ceste chose entor la saint Jehan, que li blé sont espaumé et flori. Mais quant la pais fu reformée, si com nous avons dit, aucun des chanoines d’Amiens qui devoient prendre leur provendes en cel lieu où li oz avoit esté, virent que il avoient tot perdu, si com il leur sembloit. Il s’en complainstrent à leur doien et à leur chapitre, et leur requistrent humblement, en amor et en fraternité, que il leur aidassent dou commun à passer cele année, et que il leur repartesissent de leur fruiz pour le domage que il avoient eu. Li doiens et li chapitres leur respondirent que il attendissent jusques aprés aoust, que li blé seroient cuilli et batu, et que il feissent bien recuillir le remanant des blez que li oz le roi avoit triblez, et li chapitres leur rendroit leur defaut. Quant li blé furent batu et mesuré en l’aire, il en troverent à C doubles plus[4], non mie tant seulement de celui qui avoit esté triblez et defoulez, mais de celui qui avoit esté aus faucilles soié pour doner aus chevaus. En la place où li Flamenc orent lors esté logié, furent li blé et les herbes si sechiés, que il n’i aperut ainques de cele année ne herbe, ne chose qui verdoiast.
