l’amonesta li roiz une foiz et autre, et puis la tierce devant toz ses amis et li proia moult debonairement que pour Dieu et pour pitié, et par la foi que il devoit à la corone de France, que il rendist aus eglises ce que il leur avoit tolu et que il ne feist plus tiex choses. Et puis, li dist à la parfin, que se il ne l’amendoit, il l’en pugniroit et vencheroit en lui les torz faiz des eglises.
[1]Li dux vit bien la volenté le roi et aperçut que il avoit ferme constance en toz ses diz et ses faiz. Torbez et esmeuz se parti de cort et s’en ala en Borgoigne ; mais li rois li ot avant commandé que il rendist XXXm livres de deniers[2] aus eglises, que il leur avoit à forces tolus ; et li avoit encores commandé que il li amendast la force que il avoit faite aus eglises contre les chartres roiaus de ses ancesors. Mais li dux refusoit ce à faire et queroit fuites et dilations frustratoires par malice, et cuidoit ensi fuir et eschaper la venjance roial. Mais quant li rois vit s’entention, et que il refusoit à obéir à son commandement, il cuilli grant ost et mut à armes contre lui. En Borgoigne entra a grant force, o chevaliers et champions aprestez de combatre et de soustenir toute adversité en la defense de sainte Eglise et dou clergié, qui lors estoit vius tenuz[3] en Borgoigne, car li prestres i estoit ausi defolez come li vi-
