sel entre aus et fu acordé de touz que par toutes les rues de la vile, en cele part où li sieges estoit, mait[1] l’on bones barres de gros fuz en plusor liex. Ensi le firent, por ce que se li nostre se maissent dedenz, tandis com il entendissent à couper ces barres, li Tur s’en poissent aler par les portes, et mener à sauveté lor fames et lor enfanz. Bien sembloit que il n’aussent mie corage de la vile defendre longuement, se il fussent à meschief, quant il ja s’atornoient dou foir. Asez estoit legiere chose de faire si grant fait comme de prendre la cité de Damas, se Nostres Sires i vousit avoir ovré. Mais por les pechiez de la crestienté et por ce, espoir, que il estoie[2] cele grant chose à faire acomplir par autres genz en aucun tens, soufri que la malice au deable, qui toz jors est preste, destorba cele haute besoigne. Mainz i avoit ja des Sarradins qui avoient troussé totes les choses que il en baoient à porter quand il s’enfoissent. mais li plus sage d’aus se porpenserent que des barons de la terre de Surie i avoit mainz qui estoient de trop grant covoitise. Bien cognurent que les cuers des crestiens qui là estoient asemblé, ne vaincroient-il mie par bataile, por ce, voudrent esaier à vaincre les cuers d’aucuns par avarice. Il envoierent à ces barons lor messages ; trop grant avoir lor promidrent et bien les en aseurerent, se il pooient tant faire que li sieges se partist d’iluec. Bien est voirs que cil barom furent de la terre de Surie ; mais lor nons, ne lor lignages, ne les terres que il tenoient ne nome pas l’estoire, espoir, por ce que il i avoit encore vis de lor hoirs que ne le soufrissent pas
