en pais. Cil barom, quant il orent empris le mestier Judas de porchacier la traïsom contre Nostre Segnor, il vindrent à l’emperaor, et au roi de France, et au roi de Jerusalem, qui moult les creoient et lor didrent que ce n’avoit pas esté bons consauz d’asoir[1] la cité par devers les jardins, car ele i estoit plus forz à prendre que de nule autre partie. Por ce, didrent que il requeroient à ces granz segnors et lor looient en bone foi que il, ançois que il gastassent ilueques lor paines et perdissent lor tens, faissent l’ost remuer et asoir la cité en ce costé qui estoit tot droit contre celi que il avoient assis ; car, si com il disoient, ès parties de la vile qui sont contre orient et contre midi, n’avoit ne jardins ne aubres qui destorber les poissent à venir là ; li fluns n’i couroit mie qui fust gries à guegnier ; li murs estoit là endroit bas et foibles, si que il n’i covenit ja engins à drecier, ançois porroit bien estre pris de venue.
Quant li prince et les autres barons les oïrent ensi parler, bien cuiderent que il deissent en bone entenciom, si les en crurent et firent crier parmi l’ost que tuit se delojassent et suissent[2] les barons que il lor nomeroient. Li traitor se midrent avant, tot l’ost menerent près de la vile juque il furent en la partie de quoi il savoient de voir, que ele n’avoit garde d’assaut, et où li oz auroit grenor soufrete de totes choses, si que il ne porroit ilueques demorer en nule maniere. Là, fichierent les banieres aus princes et firent l’ost logier tot entor. N’orent gueres demoré en cele place que il s’aperçurent et sorent certenement que traï es-
