Quant le roy donnoit aucuns benefices qui apartenoient à sa collation, il feisoit enquerre se il estoient bonnes personnes et de nete vie, sanz luxure, sanz orgueil et sanz arrogance, especialment quant evesque ou arcevesque moroit, là où il avoit son regale, par le chancelier de Paris et par autres bonnes genz ; et cil qui avoient bon renon, avoient les provendes. Il ne donnoit nul benefice à clerc nul, tant fust letrez, qui eust autre prouvende ou autre benefice, se il ne resignoit avant ceus que il tenoit. Ne ne volt donner onques ne otroier benefices ne prouvendes, se il n’eust certains tesmoins que il fust vagues et que cil qui le tenoit estoit mors.
Touz les jourz de l’an, disoit le roy les heures de Nostre Dame entre lui et son chapelain et tout le service des mors ; et quant il disoit ses heures il se gardoit de parler, se ce ne fust pour aucun pour qui il ne le peust pas bien refuser.
Une chose de memoire dingne devons bien raconter.
