chevalerie contre Sarrazins. « Mais il m’est aviz », dist le roy, « que miex me vendroit monstrer ma prouece contre les Sarrazins qui sont prochainz de moy et joignent à nostre reanme. Se vous le loez, vez-ci près de nous le roy de Maillogres qui ne nous aime ne ne prise i bouton ; et si tient belle terre et bonne, laquelle nous porrons bien avoir, se vous me volez aidier. Et se Diex donne grâce que nous la puissons conquerre, nous en departirons à noz amis bien et largement, et en sera Nostre Sires Jhesucrist serviz et honorez, et la fausse loy qu’il tienent, destruite. » Les barons respondirent qu’il estoient prest de lui aidier et de metre leurs corps et leurs vies abandon.
Quant le roy vit la bonne volenté de ses hommes, si assambla son ost de tant de gent comme il pot avoir, et entra en la terre de Maillogres[1]. Les fourriers qui aloient devant acueillirent la proie, si comme chievres, bues, moutons et amenerent en l’ost au roy d’Arragon, et mistrent à mort touz les Sarrazins qu’il trouverent. Si leva la noise et le cri, et s’en alerent Sarrazins fuiant vers les fortereces et vers les Vaus de Buryenne[2]. Et en tel maniere s’en ala le roy d’Arragon, gastant tout avant lui, tout droit le chemin, à la cité de Maillogres. Et d’autre part, il envoia ii freres, les meilleurs chevaliers de son ost es Vaus de Burienne ; et en tel maniere s’en ala le roy d’Arragon.
- ↑ C’est en 1229 que Jacques Ier, roi d’Aragon, fit l’expédition contre l’île de Majorque.
- ↑ Les Vaus de Buryenne ; on a désigné ainsi la ville de Burriana (ancien royaume de Valence ; auj. Espagne, prov. de Castellon de la Plana), à dix kilomètres au sud de la ville de Castellon de la Plana qui fut enlevée aux Maures en 1233 par Jacques Ier, roi d’Aragon.
