Tant alerent les ii freres avant qu’il vindrent à i chastel près d’une valée ; là se reposerent jusque à l’endemain. Quant vint au matin, si commanderent tantost à leur gent qu’il feussent tuit garni de leur armes et tuit prest pour aler avant seur leur anemis, et il si firent si comme il orent commandé. Les ii freres s’armerent et s’en alerent devant, ne n’atendirent pas leur compaignie, comme cil qui ne cuidoient pas estre si près de leur anemis ; si ne furent pas esloignié de leur ost plus du quart d’une mille, que Sarrazin, qui estoient muciez es roches, leur coururent sus et les avironnerent de toutes pars. Cil qui se virent soupris, se mistrent à deffensse et avoient esperance qu’il feussent tost secouru de leur gent, avant qu’il feussent pris ne ocis ; mais les Sarrazins se hasterent mout d’eulz empirier ; si les bouterent jus de leur chevaus, et puis leur bouterent les glaives es cors ; si les ocistrent. Quant il orent ce fait, il tornerent en fuie vers i chastel qui estoit à ii milles d’iluec, et les Arragonnois chevauchierent tout le chemin ; si trouverent leur maistres occis. De ceste aventure furent si esbahi et si troublé qu’il ne sorent que dire ne que faire ; si garderent et quistrent de toutes pars se il peussent trouver ceus qui ce domage leur avoient fet, et penserent qu’il estoient torné vers le chastel qui estoit devant euls.
Si s’en alerent hastivement cele part et assaillirent le chastel tantost comme il i furent venu ; et cil dedens se deffendirent et firens brandons de feu sus la plus haute tour, pour ce que cil des autres villes voisines les poissent veoir et qu’il les venissent secourre. Et li Arragonnois entendirent à assaillir, et tant firent
