qu’il entrerent ens par devers les jardins ; si pristrent par force le chastel et occistrent touz ceus qu’il i trouverent, et homes, et fames, et enfanz, et puis bouterent le feu ou chastel partout, et se mistrent au chemin droit au roy d’Arragon, et li conterent le domage qu’il avoient eu. Li rois fu mout dolens et corrouciez de la mort des ii chevaliers, et jura et promist à Dieu qu’il ne retorneroit mais vers Arragon devant qu’il auroit leur mort vengiée.
Le roy de Maillogres qui bient savoit comment l’en gastoit sa terre, manda secours au roy de Garnete et au roy de Marroc et au prince d’Aumarie, et d’autre part il le fist asavoir au roy de Barbarie et à cil de Bougie pour avoir secours et aide. Quant il ot Sarrazins assamblez, si issi hors de Maillogres contre le roy d’Arragon à bataille. Le roy Jaques fu d’autre part qui bien ordena ses batailles et leur monstra exemple de chevalerie, et qu’il penssassent de bien ferir seur Sarrazins, s’il vouloient avoir l’amour de Dieu. Quant Arragonnois furent près de leur anemis, si bessierent les glaives et se ferirent en euls.
Entre les Sarrazins en y avoit i merveilleusement grant et plain de grant force ; si tenoit une guisarme[1] et s’en vint vers le roy, et le cuida ferir à plain braz estendu. Mais le roy torna de costé pour le cop eschever ; et i chevalier qui fu près du Sarrazin, feri son cheval d’une lance jusques aus boiaus. Au trebuchier que le Sarrazin fist de son cheval, si comme la teste li enclina vers terre, le roy le feri entre les jointures de son hiaume et la gorgiere, d’une espée longue et
- ↑ Guisarme, sorte de hache.
