Autres balades (Christine de Pisan)/XI
XI
Haulte, poissant, trés louée Princece,
Bonne et belle, vaillant de tous nommée,[1]
Pleine de sens, d’onneur et de noblece,
Et en maint lieux redoublée et amée,[2]
Par le monde trés excellant clamée,[3]
Et parfaitte toute de corps et d’ame,
On ne pourroit vostre grant renommée
Assez louer, ma redoubtée dame.
Acomparera Pallas la déesse,
Et a Juno qui tant est reclamée,
Certes vous puis, pour vostre grant sagece ;[4]
Et pour la trés riche honneur affermée
Ou vous estes, ne jamais extimée
Vostre valeur ne pourroit estre de ame
N’escripture, fust en prose ou rimée,
Assez louer, ma redoubtée dame.
Semiramis ressemblez de largece
Qui fu si preux et tant est reclamée,[5]
Et de purté la trés belle Lucrèce,
La rommaine de grant constance armée,
De loyaulté Hester la non blasmée.
En touz estaz, plus que nulle autre femme,
On ne vous puet, tant estes bien formée,
Assez louer, ma redoubtée dame.
Trés excellent en grace confermée.
De vous partout cuert si trés noble famé
Qu’on ne vous puet, c’est bien chose informée,[6]
Assez louer, ma redoubtée dame.