Autres balades (Christine de Pisan)/XXIX
XXIX
contre sept Anglais.) [19 mai 1402.]
Prince honnoré, duc d’Orliens, louable,
Bien vous devez en hault penser déduire
Et louer Dieu et sa grace amiable[1]
Qui si vous veult en tout honneur conduire
Que le renom par le monde fait luire
De vostre court remplie de noblece
Qui resplendit comme chose florie
En noble ioz, et adès est radrece
De hault honneur et de chevalerie.
Or ont acreu le loz li sept notable
Bon chevalier que vaillance a fait duire
Si qu’a grant loz et victoire honnorable[2]
Ont desconfit les sept Anglois, qui nuire
Aux bons François cuident et les destruire ;
Mais le seigneur du Chastel, ou proece
Fait son réduit et la bachelerie,
Bataille, ont mis Anglois hors l’adrece
De hault honneur et de chevalerie.
Et Kerhoïs le breton secourable[3]
Qui mains grans biens fera ainçois qu’il muire,
Et Barbasan et Champaigne amiable,[4]
Et Archambaut qui fait son renom bruire,
Le bon Clignet de Breban qui aduire
En armes veult son corps et sa jeunece ;
Par ces sept bons est la gloire perie
De noz nuisans qui perdent la haultece
De hault honneur et de chevalerie,
Prince poissant, honnourez a leece
Les bons vaillans ou valeur n’est perie.[5]
Car vous arez par eulx toute largece
De hault honneur et de chevalerie.