Ballades (Charles d’Orléans)/Ballade XVII
L’autre jour tenoit son conseil,
En la chambre de ma pensée.
Mon cueur qui faisoit appareil
De deffence contre l’armée
De Fortune mal advisée
Qui guerryer vouloit Espoir,
Se sagement n’est reboutée,
Par bon Eur et Loyal Vouloir.
Il n’est chose soubz le souleil
Qui tant doit estre desirée
Que Paix ; c’est le don non pareil
Dont Grace fait toujours livrée
À sa gent qu’a recommandée ;
Fol est qui ne la veult avoir,
Quant elle est offerte et donnée
Par Bon Eur et Loyal Vouloir.
Pour Dieu, laissons dormir Traveil ;
Ce monde n’a gueres durée,
Et Paine, tant qu’elle a sommeil,
Souffrons que prengne reposée.
Qui une foiz l’a esprouvée
La doit fuyr, de son povoir,
Par tout doit estre deboutée,
Par Bon Eur et Loyal Vouloir.
Dieu nous doint bonne destinée,
Et chascun face son devoir,
Ainsi ne sera redoubtée
Par Bon Eur et Loyal Vouloir.