Ballades sur plusieurs sujets/Ballade XIX
Amour qui tant a de puissance
Qu’il fait vieilles gens rassoter.
Et jeunes plains d’oultrecuidance,
De tous estas se scet meller,
Je l’ay congneu pieçà au cler,
Il ne fault jà que je le nye,
Parquoy dis et puis advouer
Ce n’est fors que plaisant folie.
À droit compter, sans decevance,
Quant un amant vient demander
Confort de sa dure grevance,
Que vouldroit il faire ou trouver ?
Cela, je ne l’ose nommer ;
Au fort, il fault que je le die,
Ce qui fait le ventre lever ;
Ce n’est fors que plaisant folie.
Bien sçay que je fais desplaisance
Aux amoureux, d’ainsi parler
Et que j’acquier leur malvueillance ;
Mais, s’il leur plaist me pardonner,
Je leur prometz qu’au par aler.
Quant leur chaleur est refroidie,
Ilz trouveront que, sans doubter,
Ce n’est fors que plaisant folie.
Prince, quant un prie d’amer,
Se l’autre si veult accorder,
Il n’y a plus, sans moquerie ;
Laissiez les ensemble jouer,
Ce n’est fors que folie.