Ballades sur plusieurs sujets/Ballade XVIII
Visaige de baffe venu
Confit en composte de vin,
Menton rongneux et peu barbu,
Et dessiré comme un coquin,
Malade du mal saint Martin,
Et aussi ront q’un tonnellet ;
Dieu le me sauve ce varlet !
Il est enroué devenu,
Car une pouldre de raisin
L’a tellement en l’ueil feru
Qu’endormy l’a, comme un touppin ;
Il y pert un chascun matin,
Car il en a chault le touppet ;
Dieu le me sauve ce varlet !
Rompre ne sauroit un festu,
Quant il a pincé, un loppin,
Saint Poursain qui l’a retenu
Son chier compaignon et cousin,
Combien qu’ayent souvent hutin,
Quant ou cellier sont en secret !
Dieu le me sauve ce varlet !
Prince, pour aler jusqu’au Rhin,
D’un baril a fait son ronssin,
Et ses espérons d’un foret ;
Dieu le me sauve ce varlet !