Cent Ballades (Christine de Pisan)/Ballade LXIII

Ajouter des liens
À relire
La bibliothèque libre.
À il doncques tel guerredon ?
Cent Ballades, Texte établi par Maurice Roy, Firmin Didot,  (p. 64-65).


LXIII



Amours ! Amours ! ce m’as tu fait,
Qui m’as mis en si dur parti.
Se ne te feis je oncques meffait,
Et si ay tant de maulx parti
Largement m’en as departi ;
Et qui te fait de son cuer don,
A il doncques tel guerredon ?

Ton soulas est bien contrefait,
Il s’est de moy tost departi,
Contre le bien mal me reffait ;
En grant doulour s’est converti,
Tu m’occis sanz dire « gar t’y ! »
Va il ainsi qui te sert don,
A il doncques tel guerredon ?

Et pour quoy, ne pour quel tort fait,

M’as tu un tel ami sorti,
Qui ma vie et mes jours deffait ?
Car par lui suis en tel parti
Que tout mon sens est amorti.
Qui tu esprens de ton brandon,
A il doncques tel guerredon ?

Récupérée de « https://fr.wikisource.org/w/index.php?title=Cent_Ballades_(Christine_de_Pisan)/Ballade_LXIII&oldid=9715685 »