Comtor d’Apchier rebuzat
Comtor d’Apchier rebuzat,
pos del chan vos es laissat,
recrezut vos lais e mat,
luenh de tota benanansa,
vencut de guerr’ e sobrat,
comtor mal encompanhat,
ab pauc de vi e de blat,
plen d’enoi e de carn ransa.
Aisi prenc de vos comjat,
pos · · · · · · · · · ·
e del vostre vielh barat,
e de vostra vielha pansa,
e del nas tort, mal talhat,
e del vezer biaisat,
que tal vos a Dieus tornat
c’anas co escut e lansa.
Beus a breuiat lo corril
Monlaurs, que tenias vil,
que de mai tro en abril
vos fai estar en balansa;
e non aves senhoril
tant aut so dur cor apil,
que ia.us trobon en planil,
per que.m pren de vos pezansa.
Et an vos claus lo cortil
sil que.us son deus lo capil,
e tornat de brau humil
e tout chan et alegransa;
e s’anc raubes loc mongil
ara.us faitz dire a mil
que Dieus e l’orde clergil
vos an tout pretz et onransa.
Pos del chantar em al som
aisie.us desampar lo nom;
totz vostr’ argens torn’ en plom
e vostr’ afars desenansa.
Vilhet pus blancs d’un colom,
be.us menon de tom en tom,
e no sabetz qui ni com.
Tart seres mais reis de Fransa!