Comunal veill, flac, plaides
Comunal veill, flac, plaides,
paubre d’aver et escas,
tant faitz malvais serventes
que del respondre sui las ;
e.l vostra cavalaria
venra tota ad un dia
quant er cho denan detras,
l’avols bos e.l bos malvas.
Anc un bon mot non fezes
non i ages dos malvas,
per qu’ie.us tolrai vostre ses :
mon chan, ah que.us formias ;
quar chantatz ab vilania,
que.ill comtessa me.n chastia
que ten Beders e Burlas,
que ditz que vos rebusas.
Anc sagramen non tengues
del tornel, quant l’avias ;
ni nuill temps ver non disses,
si mentir non cuidavas ;
et anatz queren tot dia
qu’om se fi ; e qui se fia,
tenetz lo taulier e.ls das,
e del ioc sabetz assas.
Qui.us tolia Vivares,
l’Argentieira e.l Solas,
on lor comtatz mainz orbes,
mesures vos hom lo vas ;
que quant Pons-tortz vos passia
e Sainz-Laurens vos vestia,
siatz totz paubres e ras,
que sieus es anquer, si.os plas.
Et avez tanz de mais près
aras e d’aissi en tras
que non sai cum vos tolgues
qui.l pe no.us tolli ’ o.l nas
o del tôt no.us aussizia.
si no fos la cofrairia
de Chasiers e de Carias,
ab los pecols anaras.