Iconologie (Cesare Ripa, 1643)/I/Fermeté d’Amour

La bibliothèque libre.


Fermeté d’amovr. LXI.


ELle eſt repreſentée par vne Femme aſſiſe, richement veſtuë, & qui tient les deux mains enlacées l’vne dans l’autre ; ayant ſur la teſte deux Ancres en forme de croix, vn Cœur au milieu, & ces paroles au deſſus : Mens est firmissima, comme qui diroit, Reſolution immuable.

Par le riche habillement, dont elle eſt parée, il eſt monſtré, qu’Amour eſtant volage de ſa nature, il faut tenir pour precieuſe la Conſtance, quand elle s’y trouue iointe : Par les deux Ancres liez enſemble, Que l’Eſperance fortifiée par la Raiſon, eſt le plus ferme appuy d’vn cœur amoureux : Par ſes mains enlacées, Que la Foy doit eſtre inſeparable d’auec la perſonne qui aime ; Et par ſon action poſée, Que s’il y peut auoir quelque repos d’eſprit en Amour, il faut neceſſairement qu’il procede d’vne ferme reſolution, ou qu’elle en face du moins la meilleure partie.