Iconologie (Cesare Ripa, 1643)/I/Fidelité

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 73-74).

Fidelité. LXII.

L’On n’en peut faire vn Tableau plus conuenable que celuy-cy, qui eſt d’vne Femme veſtuë de blanc, ayant en l’vne de ſes mains vn Cachet : En l’autre vne Clef : Et à ſes pieds vn Chien.

Cette Figure n’a pas beſoin d’explication, puis qu’il n’y a celuy qui ne ſçache bien, Que le cachet & la clef ſont des ſymboles de Fidelité : Auſſi a-t’on accouſtumé d’en vſer à ſéeller, & à ſerrer les choſes que l’on veut tenir ſecrettes.

Pour le regard du chien, l’experience fait voir tous les iours, que c’eſt le plus fidelle de tous les animaux, & le plus amy de l’homme. Teſmoin celuy de Titus Labienus, qui ne partit Plin. hiſt. nat. lib. 8. iamais d’auprés de ſon maiſtre, & qui le voyant precipité dans le Tybre par les degrez Gemonins, s’y ietta incontinent apres luy, & ſe noya finallement à force de nager, & de faire le plongeon.