Iconologie (Cesare Ripa, 1643)/I/Oraiſon
Oraison. CXII.
Ette Femme veſtuë de blanc, & qui eſt ſur le declin
de ſon aage, repreſente l’Oraiſon. Elle a les
yeux hauſſez vers le Ciel, & les bras ouuerts, tenant
à genoux vn Encençoir, où eſt attaché vn Chapelet,
au lieu des chainons qu’on a couſtume d’y mettre.
Lib. offic. Elle eſt veſtuë de blanc ; pource, dit ſainct Ambroiſe, qu’elle doit eſtre pure, ſimple, claire, & manifeſte.
Elle se tient à genoux, & les bras ouuerts, pour vne marque de la reuerence qui ſe doit à Dieu, & particulierement quand on luy adreſſe quelque priere.
Ses yeux qui regardent le Ciel, d’où s’eſpandent ſur elle des rayons reſplendiſſans, monſtrent, comme dit ſainct Thomas, Quæſt. 83. Que l’Oraiſon eſt vne eſleuation d’eſprit, & vne ardeur d’affection, par qui l’homme parlant à ſon Dieu, luy fait ſes prieres, & luy deſcouure les ſecrets de ſon cœur.
L’Encençoir qu’elle porte, eſt vn vray ſymbole de ſon eſtre, Pſal. 140. conformément à ces paroles de Dauid, Que mon Oraiſon, Seigneur, ſoit adreßée vers toy comme l’Encens. Et pour le regard du Chapelet, il luy ſert de chaine à bon droit, pource qu’il conſiſte en l’Oraiſon Dominicale, & en la Salutation Angelique, dont l’vn fut compoſé par noſtre Seigneur Iesvs-Christ, & enſeigné aux Apoſtres, quand ils luy demanderent, qu’il leur appriſt à prier ; & l’autre par l’Ange Gabriel, par ſaincte Elizabeth, & par l’Egliſe noſtre bonne Mere.
L’Oraiſon au reſte, eſt peinte vieille, d’autant qu’en ce declin-là, nous y vacquons plus qu’en pas vn autre aage, comme eſtans plus proches de noſtre derniere fin.