Iconologie (Cesare Ripa, 1643)/I/Penitence
Penitence. CXXI.
L ſeroit difficile, à mon aduis, de la mieux repreſenter
que par cette Figure, à qui eſt celle d’vne Femme extremement
maigre, melancolique, & fort mal veſtuë.
Elle tient vne diſcipline en vne main, vn poiſſon en l’autre, vn
gril à ſon coſté, vne Croix deuant, & les yeux fixes au Ciel.
La Penitence, qui eſt vne douleur des pechez commiz, que l’on reſſent plus pour l’amour de Dieu, que pour aucune crainte de la peine, contient en ſoy trois parties principales, qui ſont la Contrition, la Confeſſion, & la Satisfaction. La premiere est denotée par ſon viſage bleſme & melancolique. La ſeconde, par ſes yeux eſleuez au Ciel, pour vn teſmoignage du pardon qu’elle demande à Dieu : Et la troiſieſme par le gril, inſtrument proportionné à la peine temporelle, par qui se meſure encore le merite de cette vertu qui nous viuifie. Adjouſtons à cecy, que comme le gril eſt vn milieu entre le feu & la choſe que l’on cuit ; la Penitence de meſme en eſt vn autre entre les douleurs du pecheur & l’Amour de Dieu, qui en eſt le motif.
Pour ce qui eſt de la diſcipline & du poiſſon qu’elle tient en ſes deux mains, cela ſignifie que la Penitence pour eſtre ſalutaire, ſe doit aſſaiſonner auec le Ieuſne & la Contrition.
Par la Croix encore il faut entendre la patience, & la correction de ſoy-meſme, pour la conformité merueilleuſe que le penitent s’acquiert auec Ieſus-Chriſt, en renonçant aux vanitez de la terre : à quoy il eſt exhorté par ces paroles, Qui veut eſtre mon Diſciple, qu’il porte la Croix, & qu’il me ſuiue.