Iconologie (Cesare Ripa, 1643)/I/Splendeur de nom
Splendevr de nom. CLVIII.
Et Homme de bonne mine, de belle taille, & d’vn
aage viril, ſemble animer les grands courages à
faire des actions qui éclattent, & qui les mettent
dans vne haute reputation. Il eſt veſtu d’vne Robe
tiſſuë d’or & de pourpre, & couronné d’vne Guirlande d’Hyacintes
rouges. Auecque cela il porte au col vne chaine d’or,
& s’appuye de la main droite ſur vne Maſſuë, tenant de la gauche
vne Torche allumée.
On le peint agreable, & bien proportionné de ſes membres, pource qu’au dire de Platon, La beauté du corps eſt vne marque d’vne ame vertueuſe ; Et ſelon Ariſtote, Vn indice vray-ſemblable que l’interieur ne dément point l’exterieur.
Son aage viril ſignifie, Que n’ayant ny l’humeur éuentée des ieunes gens, ny la foibleſſe des Vieillards, il eſt en eſtat d’executer les hautes entrepriſes, où par vne grandeur de courage il ſe void porté, pour s’acquerir de la gloire.
Il eſt veſtu de drap d’or, à cauſe que ce metal eſt le plus noble de tous, & reſplendiſſant de ſa nature. Voila pourquoy les anciens Empereurs en auoient des robes tiſſuës, quand ils vouloient paroiſtre dans les ſolemnitez publiques. Teſmoin le vieil Tarquin, cinquieſme Roy des Romains, qui en porta vne, Plin. lib. 33. cap. 3. lors que le premier de tous il fit ſon entrée à Rome parmy les magnificences & les honneurs du triomphe : Mais pour mieux rehauſſer l’éclat de cét or, on y adjouſtoit de la ſoye teinte Plin. lib. 8. cap. 38 en pourpre ; comme il ſe verifie par les Eſcrits de pluſieurs Autheurs. De maniere qu’vn ſi riche habillement n’eſtant donné Alex. ab Alex. Genial. lib. 4. cap. 28 d’ordinaire qu’aux hommes les plus illuſtres, ce n’eſt pas ſans raiſon que nous en parons celuy-cy, pour repreſenter la ſplendeur du nom, ou l’eſclat de la vraye Gloire.
Il eſt couronné d’Hyacintes, pour memoire de ce qu’Apollon, Met. 20. comme dit Ouide, transforma en cette fleur de couleur de pourpre vn ieune homme de ce nom, qui eſtoit doüé d’vne ſinguliere beauté. Et comme ce meſme Dieu eſt appellé Protecteur des Muſes, & des bons Eſprits ; cette fleur auſſi eſt priſe pou vn ſymbole de Prudence & de Sageſſe. Cette Guirlande n’eſt donc pas mal conuenable aux hommes illuſtres, qui ſe rendent recommandables par leurs propres Vertus, & par la bonne odeur qu’ils donnent d’eux. Auſſi eſt-ce pour cela que le meſme Poëte conclud ainſi la Metamorphoſe d’Hyacinthe.
Tu ſeras touſiours en ma bouche ;
Et touſiours ma Lyre & mes Vers,
Feront connoiſtre à l’Vniuers
Combien ton ſouuenir me touche.
La Chaiſne d’or qu’il porte à ſon col, eſt vne de ces fameuſes marques d’honneur qui ſe donnoient anciennement aux grands Capitaines. Teſmoin entre les autres le celebre Guerrier L. Cicinius Dentatus, Tribun du peuple, qui apres auoir eſté victorieux en ſix-vingt combats, receut pour digne prix de ſa valeur trois de ces Chaiſnes, quatre-vingts Bracelets, dix-huict Lances, & cent cinquante Couronnes, ioint qu’il ſe trouua preſent au triomphe de neuf Empereurs, à quoy ſon courage & ſa conduite contribuerent beaucoup.
Il s’appuye de la Main droite ſur la Maſſuë d’Hercule, pource que par elle les Anciens ſouloient ſignifier l’idée de toutes les Vertus iointes enſemble. En effect tous ceux qui aſpirent à la Gloire, & qui rendent illuſtre leur nom, prennent la Vertu pour leur vnique ſupport, & s’eſloignent autant qu’ils peuuent des vices, qui ne font que noircir la reputation.
Quant au Flambeau qu’il tient en la main, ſa lumiere eſt vn ſymbole de la gloire des Iuſtes, & de l’eſclat de leur nom, qui durera ſans fin, & en ce monde & en l’autre : Ce que perſonne ne peut mettre en doute, puis qu’il eſt dit dans les ſainctes 5. Math. 15. Lettres, Que les Iuſtes luiront comme le Soleil dans le Royaume de leur Pere.