Iconologie (Cesare Ripa, 1643)/II/Amour de la Gloire

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 96-99).

Amovr de la gloire.

CEtte Figure, comme la precedente, eſt celle d’vn Enfant nud, & couronné de Laurier ; Il tient en ſes mains deux differentes Couronnes, qui ſont la Ciuique, & l’Obſidionale, qu’il ſemble vouloir preſenter à quelqu’vn, ſans y comprendre les autres, comme la Murale, & la Nauale, qui parmy les Romains estoiẽt les prix des Vainqueurs, Aulegelle rapporte que la Couronne Triomphale qu’on donnoit aux Capitaines victorieux, eſtoit anciennement de Laurier ; L’Obſidionale de Gramen, de laquelle n’eſtoient honorez que ceux qui dans vn extreme peril auoient ſauué toute l’Armée ; La Ciuique faite d’vn rameau de Cheſne, marquoit la valeur de ceux qui dans quelque combat, auoient ſauué la vie à vn Citoyen Romain ; La Murale, eſtoit le prix ordinaire d’vn Capitaine ou d’vn Soldat, qui auoit eſcaladé le premier les murailles d’vne Ville ennemie ; Et la Nauale repreſentant pluſieurs becs de Nauires, ſe donnoit à celuy qui auoit commencé l’attaque dans vn combat naual.